|
Allt og oft hefur sú staða komið upp að fólk sem er undir áhrifum áfengis og/eða annara vímuefna ákveður að keyra án þess að gera sér grein fyrir alvarleika málsins, fyrrtur allri skynsemi, eiga það á hættu að skaða einhverja alvarlega, eða jafnvel verða sjálfum sér eða öðrum að bana.
Við vitum það eflaust öll hversu óábyrg og kærulaus við getum orðið undir áhrifum. Hvað er hægt að gera til að sporna við þessu alvarlega vandamáli? Enn og aftur lendum við í því hér á Suðurnesjum að missa nokkur ungmenni í einu og sama slysinu, slysi þar sem neysla áfengis og fíkniefna hefur verið með í för. Öll erum við harmi slegin og sorg hvílir yfir landsmönnum vegna þessa. Þetta er ekki fyrsta slysið og því miður ekki það síðasta, en við getum kannski fækkað þeim kæru landsmenn ef við bara stöndum saman. Hættum að horfa í hina áttina eins og að okkur komi þetta ekki við. Þetta getur komið fyrir þig eða þína nánustu ef ekkert er að gert. Það er skylda okkar að láta vita ef það er hinn minnsti grunur um að viðkomandi sé undir áhrifum, það getur orðið til þess að BJARGA LÍFI. Það er ekki gaman eða gott að vita til þess að einhver okkur nákominn sé valdur af slysi vegna þess að við gerðum EKKI NEITT. Ég votta þeim fjölskyldum innilega samúð mína sem misstu börn sín í þessu hörmulega slysi hér við Mánatorg um nýliðna helgi, líka þeim einstaklingi og fjölsk hans sem ók bílnum. Ég vona líka innilega að allir, þ.e.a.s fjölsk og vinir fái tilheyrandi áfallahjálp, stuðning og þá sálgæslu sem þeim ber, og dugar til framtíðar. Það er svo alltof algengt að fók sem lendir í alvarlegum áföllum fái ekki tilhlýðandi aðstoð, jú kannski rétt í byrjun, sem er svo langt frá því að vera nægilegt, síðan skal bara hver og einn sjá um sig. Þetta er eins og í öllu öðru, það þarf að þyggja hjálpina sem býðst, ekki gera lítið úr henni og halda að það verði allt í lagi. Alltof oft heyrum við þessa setningu: ÉG ÞARF ENGA HJÁLP skoða það bara seinna. Þetta á ekki að vera svona, jú við erum dofin fyrir þessu og gerum okkur ekki grein fyrir því hversu sorgin ristir djúpt fyrr en einhverntíman seinna, en þá geta sárin verið orðin það djúp að erfitt geti orðið að fá gróandann til að virka. Guð blessi okkur og varðveiti. Erlingur Jónsson
 |
