|
Lundur, forvarnarfélag. Ráðgjöf - eftirfylgni – stuðningur - forvarnir Lundur forvarnarfélag er félag sem leitast við að styðja einstaklinga sem eru að koma úr meðferð og aðstandendur þeirra.
Markmið með þessu starfi er að styðja við bakið á þeim sem eru að fara í meðferð vegna neyslu áfengis og fíkniefna, eða eru að koma úr henni. Einnig leggjum við mikið kapp á að hjálpa aðstandendum þeirra, en þeir þurfa ekki síður á aðstoð að halda vegna þess alvarlega ástands sem neyslunni fylgir. Fram að þessu hefur fólk sem lendir í þessari ógæfu þurft að sækja alla aðstoð til Reykjavíkur og hafa margir einfaldlega ekki tök á því vegna ýmissa aðstæðna. Það hefur því miður oft orðið mörgum að falli. Með því að vera með aðstöðu hér á Suðurnesjum og hjálpa þeim einstaklingum sem þurfa á því að halda, og vilja þiggja aðstoð, erum við um leið að vinna gegn áfengis- og fíkniefnavandanum. Við teljum að þetta starf muni án efa minnka neyslu, kaup og sölu efna, draga úr afbrotum og hafa margvísleg önnur jákvæð áhrif þessu tengt. Allt þetta er til hagsbóta fyrir fólkið sem hér býr og alla þá sem vinna að forvörnum og bættu mannlífi á Suðurnesjum. Eftir að einstaklingar hafa fengið þá ráðgjöf, stuðning og eftirfylgni sem þeir þurfa á að halda, og byggt sig upp andlega og líkamlega, þurfa þeir að viðhalda þeim bata sem hefur náðst. Lundur hefur fengið húsnæði í Sjálfsbjargarhúsinu í Reykjanesbæ, þar sem Björgin var áður til húsa. Faglærður starfsmaður frá SÁÁ er þar einu sinni í viku til að byrja með. Mun hann vera til viðtals og veita ráðgjöf, einnig að skipuleggja þá eftir-fylgni, stuðning, forvarnir o.fl. sem hann telur þurfa. Það er einlæg ósk okkar að vel takist til með þetta verkefni, og reynslan af því fram að þessu hefur skilað árangri. En til þess það verði unnið áfram á þann hátt sem við teljum nauðsynlegt þurfum við fjármagn. Því leyfum við okkur hér með að óska eftir stuðningi þínum við verkefnið. Reikningsnúmer forvarnarfélagsins Lundar er; 1109-05-411911 Kennitala: 690208-0750 Nánari upplýsingar veitir með ánægju, Erlingur Jónsson í síma 772-5463 www.lundur.net
 |
